Posted on

Rhoddion yn ffordd allweddol o sicrhau arian a cherddoriaeth i Ensemble Cymru

Mae Ensemble Cymru, sy’n elusen gerddoriaeth siambr, yn dathlu 15 mlynedd o fynd â pherfformiadau cerddoriaeth siambr o ansawdd uchel i gymunedau ledled gogledd Cymru, ac i nodi’r achlysur arbennig hwn maent yn gofyn i chi chwarae eich rhan yn eu Her Rhoi Mawr y Nadolig.

Dewiswyd y grŵp cerddoriaeth glasurol sydd wedi ei leoli ym Mangor o blith miloedd o elusennau eraill i gymryd rhan yn ymgyrch gyllido gyfatebol ar-lein fwyaf y DU, y Rhoi Mawr, sy’n dyblu’r rhoddion a roddir yn ystod cyfnod o 72 awr yr wythnos nesaf.

Mae addewid o £5,000 eisoes wedi cael ei godi gan Ensemble Cymru ond yr unig ffordd i ddatgloi’r arian hwn yw trwy roi rhoddion ar-lein trwy wefan y Rhoi Mawr www.thebiggive.org.uk rhwng 12pm ddydd Mawrth 29 Tachwedd tan 12pm ddydd Gwener 2 Rhagfyr. Felly, am bob punt a roddir, caiff £1 arall ei ddatgloi o’r pot addewid gan ddyblu’r rhodd wreiddiol.

Ond nid arian fydd yr unig beth a gaiff ei ddatgloi drwy roddion ar-lein; Mae cerddorion enwog Ensemble Cymru, yn cynnwys y delynores frenhinol Anne Denholm, wedi recordio negeseuon a pherfformiadau personol arbennig gaiff eu rhyddhau ar dudalennau Facebook a  Twitter yr elusen wrth i dargedau’r rhoddion gael eu cyrraedd.

big-give-postcard-2016Yn ogystal â cherddoriaeth ar-lein, bydd Ensemble Cymru hefyd yn cynnal sesiwn galw heibio yn:

  • Venue Cymru yn Llandudno ddydd Mawrth 29 Tachwedd 11:30am – 1pm
  • Dydd Mercher 30 Tachwedd, 10:30am -12pm yn Pontio ym Mangor

Bydd safleoedd cyfrannu wedi eu sefydlu lle gall cefnogwyr roi ar-lein ynghyd â cherddoriaeth gan gerddorion Ensemble Cymru.

Meddai Cyfarwyddwr Artistig Ensemble Cymru, Peryn Clement-Evans, wrth sôn am eu cynlluniau at y dyfodol:

“Yn ystod y 15 mlynedd ddiwethaf rydym wedi cael ein calonogi bob amser gan haelioni’r cyhoedd. O ganlyniad i hyn, mae degau o filoedd o bobl o bob oed yng Nghymru wedi gallu mwynhau perfformiadau byw o gerddoriaeth ysbrydoledig iawn. Rydym eisiau mynd â phethau ymhellach yn y 15 mlynedd nesaf gyda’r bwriad o ddatgloi’r gerddoriaeth hon i gannoedd o filoedd eraill o bobl o bob oed ym mhob rhan o Gymru, pwy bynnag a lle bynnag y bônt, boed mewn cymuned, canolfan siopa, capel, neuadd ysgol neu neuadd gyngherddau. Ar ran pob un ohonom, hoffwn ddiolch yn fawr iawn i bawb am beth bynnag y gallant ei roi i’n helpu wrth i ni ddechrau’r dasg o wireddu’r freuddwyd hon.”

Os gallwch gefnogi ymgyrch Rhoi Mawr Ensemble Cymru, ewch i ein tudalen ‘Big Give’ i gael rhagor o wybodaeth www.ensemble.cymru neu cysylltwch ag Angharad Hywel, Swyddog Datblygu Ensemble Cymru ar 01248 719 503 neu anfonwch e-bost at angharad@ensemble.co.uk

Posted on

Croesawu Anne Denholm, prif delynores newydd Ensemble Cymru

Anne Denholm_credit Timothy Ellis
©Timothy Ellis

Wrth i Ensemble Cymru baratoi at ddechrau tymor newydd ddiwedd mis Hydref, mae Anne Denholm, sydd newydd ei phenodi’n brif delynores yr Ensemble, yn rhoi golwg i ni ar ei swyddogaeth fel Telynores Frenhinol, ei hoffter o gerddoriaeth siambr, a sut y gwnaeth tyfu i fyny yng Nghymru helpu i feithrin ei huchelgais i chwarae’r delyn fel gyrfa.

Yn wreiddiol o Sir Gaerfyrddin ac o dras Albanaidd, daeth Anne i gysylltiad gyntaf â’r delyn fel un o’r offerynnau a gynigid yn ei hysgol gynradd fel rhan o’u cynllun gwersi offerynnol – rhywbeth a oedd “yn sicr yn fwy tebygol o ddigwydd mewn ysgol Gymreig!” yn ôl Anne.

Yn un ar ddeg oed roedd Anne yn aelod o Gerddorfa Genedlaethol y Plant ac eisoes yn dechrau ystyried gyrfa ym maes cerddoriaeth.  Erbyn iddi gyrraedd tair ar ddeg roedd wedi rhoi ei bryd yn llwyr ar yrfa gerddorol ac yn benderfynol o wneud popeth i gyflawni hynny.

Ac mae’r penderfyniad hwnnw wedi talu ar ei ganfed.  Aeth Anne ymlaen i gael gradd Meistr gyda rhagoriaeth o’r Royal Academy of Music (RAM) yn Llundain, gan ennill gwobr Scheffel-Stein i’r delyn, gwobr Syr Reginald Thatcher a Gwobr Regency am gyrhaeddiad nodedig.

Yn fuan dechreuodd Anne wneud enw iddi’i hun fel un o delynorion ifanc amlycaf Prydain ac ni fu’n disgwyl yn hir cyn derbyn gwahoddiad i un o’r swyddi amlycaf yn y wlad, sef Telynores Swyddogol i Dywysog Cymru.

06.07.15 - TRH Prince of Wales and the Duchess of Cornwall Evening Reception, Llwynywermod
©Gareth Everett

Cafodd swydd Telynor Brenhinol/Telynores Frenhinol ei hadfer yn 2000 gan Dywysog Cymru gyda thair amcan iddi: hyrwyddo’r delyn fel offeryn, hyrwyddo diwylliant Cymreig, a chefnogi artistiaid ifanc.  Mae proses penodi Telynor Brenhinol/Telynores Frenhinol yn cynnwys enwebu, ymgeisio, clyweliad a chyfweliad.  Penodwyd Anne i’r swydd yng Ngorffennaf 2015 ac mae’n cofio teimlo’n eithriadol freintiedig ac ar ben ei digon a dywed fod yr ychydig fisoedd cyntaf yn y swydd yn gyfnod o gyffro a datblygiad mawr.

Ymysg dyletswyddau eraill, mae swydd Telynores Frenhinol yn galluogi Anne i hyrwyddo’r delyn fel offeryn cymwys i gynulleidfaoedd a chyfansoddwyr fel ei gilydd, rhywbeth y mae’n teimlo’n gryf amdano:  “Mae gan bawb sy’n caru’r delyn ddyled fawr i’r Tywysog am adfer y swydd yma, sy’n galluogi i’r delyn gael ei gwerthfawrogi gan gynulleidfa ehangach, ac mae’r swydd yn sicr o gymorth i hyrwyddo’r delyn ym myd cerddoriaeth glasurol.” 

Mae Anne yn frwd ynghylch mynd â cherddoriaeth glasurol i’r gymuned ehangach.  Er 2015 mae Anne wedi bod yn perfformio dan ‘Live Music Now’, sefydliad sy’n cynnig profiadau cerddorol a chynnal cyngherddau hygyrch i bawb, yn cynnwys plant a phobl oedrannus.  Mae Anne yn gweithio hefyd gyda ‘Bach to Baby’, project sydd wedi’i anelu’n arbennig at ddarparu cyngherddau o safon i blant o bob oed.

bach-to-baby-2015_laura-ruiz_
Bach to Baby ©Laura Ruiz

Mae’n ffodus, felly, mai Anne yw Prif Delynores Ensemble Cymru; cwmni o Ogledd Cymru sy’n rhannu llawer o frwdfrydedd Anne dros fynd â cherddoriaeth glasurol at gynulleidfa mor eang â phosibl.  Fel rhan o daith Ensemble Cymru fis Hydref a Thachwedd eleni, bydd Anne, ynghyd â thri aelod arall o’r ensemble, yn mynd â cherddoriaeth siambr i gymunedau ledled Cymru gan berfformio mewn ysbytai ac ysgolion, yn ogystal â’r prif leoliadau cyngherddau.

Mae gweithio gydag Ensemble Cymru nid yn unig yn sicrhau bod Anne yn parhau â’i gwaith o fynd â cherddoriaeth i gymunedau, mae’n helpu hefyd i hyrwyddo’r delyn a’i repertoire ymhellach, rhywbeth y mae Anne yn awchu amdano:

“Mae unrhyw gyfle i gynnwys y delyn mewn cerddoriaeth siambr yn gyfle gwerthfawr i ddangos amlochredd a grym anhygoel yr offeryn. Mae’n wych o beth fod grŵp poblogaidd fel Ensemble Cymru wedi penderfynu cynnwys y delyn yn eu rhaglenni, ac rwy’n hynod falch o fod yn rhan o’r cynllun yma!” 

Wrth edrych ar brojectau gwaith blaenorol Anne, mae’n amlwg fod cerddoriaeth siambr yn agos iawn at ei chalon, a gellir olrhain gwreiddiau hynny’n ôl i’w magwraeth yng Nghymru lle roedd yn perfformio’n rheolaidd gyda cherddorion ifanc eraill, fel yr eglura;  “Roeddwn yn hynod lwcus i fod yn rhan o grŵp o deuluoedd a oedd yn annog eu plant i chwarae mewn ensembles bychain.  O gyfnod cynnar iawn roeddwn yn chwarae’n rheolaidd gyda phobl eraill o’m hoed ac roeddem yn ffodus hefyd fod gwyliau a chystadlaethau cerddorol rhagorol ar gael i ni (yn cynnwys yr Eisteddfodau a’r Wyl Cerdd Dant) lle gallem berfformio’n gyhoeddus a chael sylwadau adeiladol.  Mae gen i ddyled fawr i’r profiadau cynnar ffurfiannol yma.”  

Anne for web
©Jerome Woodwark

Gyda’r brwdfrydedd hwn dros gerddoriaeth siambr a’r delyn yr aeth Anne, ynghyd â’r Cyfarwyddwr Artistig, Peryn Clement-Evans, ati gyda’i gilydd i greu’r rhaglenni ar gyfer cyngherddau 2016-2017 Ensemble Cymru.  Bydd teithiau’r hydref a’r gwanwyn, mewn tair rhan, yn ymdrin â cherddoriaeth i’r delyn mewn ffordd amrywiol. Ar un llaw, bydd y cwmni’n archwilio cerddoriaeth o’r ugeinfed ganrif ar gyfer amrywiaeth o ensembles; ar y llaw arall, mae’r cerddorion wedi cymryd enghreifftiau o’r repertoire clasurol mwy traddodiadol a threfnu’r gweithiau fel eu bod yn cynnwys y delyn.  Bydd paru CPE Bach â Dialogues gan y cyfansoddwr Cymreig, Mervyn Burtch, yn sicr yn dangos ystod gallu a mynegiant y delyn.

Meddai Anne wrth sôn am gyd-drefnu rhaglen y tymor newydd i Ensemble Cymru, “Ein nod oedd dangos amrywiaeth o gyfuniadau offerynnol yn cynnwys y delyn (mae rhaglen yr hydref i delyn a chwythbrennau, ac ym Mai byddwn yn defnyddio cyfuniad mwy traddodiadol o ffliwt, telyn a fiola), a chreu rhaglenni sy’n amrywiol, yn adloniadol ac weithiau’n heriol – mae yna rywbeth i bawb!”

Bydd tymor newydd Ensemble Cymru’n dechrau yn Pontio ym Mangor ar 30 Hydref, yna Neuadd Dwyfor ym Mhwllheli ar 31 Hydref, Capel Gad yng Nghilcain ar 1 Tachwedd, Canolfan Ucheldre Caergybi ar 2 Tachwedd, Venue Cymru yn Llandudno ar 3 a 5 Tachwedd, Galeri Caernarfon ar 4 Tachwedd a Chanolfan Gelfyddydau Aberystwyth ar 27 Tachwedd.  Ewch i’n tudalen ddigwyddiadau  i weld y manylion llawn.

Anne yw’r cyntaf i dderbyn y Gadair Ryngwladol Gaynor Cemlyn-Jones i’r delyn.

Posted on

Telynores frenhinol yn ymuno ag Ensemble Cymru i lansio tymor newydd yr hydref hwn

Bydd Ensemble Cymru, pencampwyr cerddoriaeth siambr, yn croesawu gwestai arbennig iawn fel rhan o lansio eu Cyfres Gyngherddau newydd sbon am 2016/17.  Bydd Anne Denholm, telynores swyddogol Tywysog Cymru, yn perfformio fel rhan o’r pedwarawd yn y cyntaf o gyngherddau Ensemble Cymru a gynhelir mewn mannau ar draws Cymru fis Hydref a Thachwedd eleni.

Gan ddechrau yn Pontio ym Mangor ddydd Sul 30 Hydref, bydd Ensemble Cymru’n mynd ar daith i fannau ledled Cymru, yn cynnwys Venue Cymru, Llandudno, Galeri yng Nghaernarfon, Neuadd Dwyfor ym Mhwllheli, Canolfan Ucheldre Caergybi, Capel Gad yng Nghilcain ger Yr Wyddgrug, a gorffen yng Nghanolfan y Celfyddydau Aberystwyth ar 27 Tachwedd.

Anne Denholm_credit Timothy Ellis
Anne Denholm

Fel rhan o genhadaeth yr Ensemble i roi amlygrwydd i’r gerddoriaeth siambr orau o Gymru a ledled y byd, mae rhaglen taith Hydref a Thachwedd yn cynnwys cymysgedd rhyngwladol cyffrous o ddarnau, yn cynnwys sonatâu o’r cyfnodau Baróc a Chlasurol cynnar gan Vivaldi a C.P.E. Bach.  Yn y rhaglen hon hefyd ceir y Capriccio bywiog gan Franz Poenitz a  Deialogau gan y cyfansoddwr Cymreig nodedig Mervyn Burtch.

Dywedodd Anne, sy’n wreiddiol o Sir Gaerfyrddin yng Ngorllewin Cymru, cyn y daith:

“Mae bob amser yn bleser pur cael dod i Gymru i berfformio – mae’n dal i deimlo fel cartref!  Rwyf wedi cael amser hynod gyffrous ac ysbrydoledig wrth weithio gydag Ensemble Cymru hyd yma, ac rwy’n edrych ymlaen yn fawr at ymarfer a pherfformio’r rhaglen amrywiol rydym wedi’i llunio ar gyfer cyfres gyngherddau’r hydref yma – mae yna rywbeth i bawb ynddi!”

Bydd Peryn Clement-Evans, prif glarinetydd a Chyfarwyddwr Artistig Ensemble Cymru, yn perfformio fel rhan o’r pedwarawd yr hydref hwn, gyda’r delynores Anne Denholm, Johnathan Rimmer ar y ffliwt a’r baswnydd Llinos Elin Owen, sy’n enedigol o Bwllheli.

Ewch i ein tudalen digwyddiadau i weld manylion llawn dyddiadau’r daith.  Mae tocynnau ar werth yn awr ym mhob un o’r lleoliadau.

Posted on

Rydym eisiau dod i adnabod chi…

Mae Cyfarwyddwr Artistig Peryn Clement-Evans yn eich gwahodd am baned a sgwrs.

Mae Tymor 2016/2017 ar fin dechrau ac mae Ensemble Cymru am ddod i nabod chi, ein cefnogwyr, yn gwell. Ble gwell i ddechrau na gyda phaned a sgwrs?

Dros y chwe mis nesaf, byddwn yn trefnu diwrnodau paned mewn lleoliadau ledled Cymru. Ein nod, yw i ddod i nabod chi, ein cefnogwyr, yn well; i ddarganfod beth sy’n bwysig i chi, a sut yr hoffech weld yr Ensemble yn gwneud gwahaniaeth. Yn ogystal, byddem yn hoffi gwybod am eich syniadau ar sut i ddatblygu Cyfeillion Ensemble Cymru.

Manylion

Mae’r cyntaf o’r diwrnodau wedi cael ei drefnu ar gyfer:

Cafe Venue Cymru, Llandudno
Dydd Llun 10 Hydref, 2016 am 2.30 y.h.

Swyddfa Post a Siop Cilcain
Dydd Mawrth 11 Hydref, 2016 am 10.30 y.b.

Canolfan Arddio a Woodworks Café, Yr Wyddgrug
Dydd Mawrth 11 Hydref, 2016 am 2.30 y.h.

Os ydych am ymuno â ni, gadwech i ni wybod trwy anfon ebost i Angharad@ensemble.cymru

Posted on

Y delyn yn cloi cyngerdd olaf Ensemble Cymru

Bydd Ensemble Cymru yn cloi eu cyfres Cyngerdd Coffi gyda’r delyn yn cael lle canolog mewn rhaglen o gerddoriaeth siambr drawiadol a berfformir gan ensemble o saith, yn cynnwys pedwarawd llinynnol a thelynores wobrwyog o’r Swistir.

Bydd taith y grŵp cerddoriaeth siambr o ogledd Cymru ym mis Mai yn dwyn ynghyd gerddoriaeth gan gyfansoddwyr o Gymru a Ffrainc yn cael ei pherfformio gan offerynwyr o’r radd uchaf o Gymru ac o bell.

Bydd Elisa Netzer, telynores sydd ar i fyny yn y Swistir, ei gwlad enedigol, yn ymuno â rhai o ddoniau cartref yr Ensemble gan gynnwys y fiolydd Sara Roberts o Fôn, a Chyfarwyddwr Artistig yr Ensemble, Peryn Clement-Evans sy’n byw ym Mangor.

Wrth sôn am ei hymddangosiad cyntaf yng Nghymru gyda’r Ensemble, dywedodd Elisa:

“Wrth imi baratoi i deithio i Gymru ar gyfer y daith, ni allaf ond meddwl cymaint o fraint yw cael perfformio rhaglen rwyf wrth fy modd gyda hi, mewn gwlad sy’n caru fy offeryn i gymaint. Ni allaf ddisgwyl i archwilio’r grym mawr sy gan gerddoriaeth siambr eto: dieithriaid llwyr yn dod at ei gilydd ac yn deall ei gilydd i’r dim drwy gerddoriaeth.”  

Mae’r rhaglen yn cyflwyno cymysgedd atgofus o gerddoriaeth gan gynnwys un o’r darnau mwyaf trawiadol o hardd i’w gyfansoddi erioed, Cyflwyniad ac Allegro gan Ravel, sy’n dangos yn berffaith ystod mynegiant y delyn. Bydd yna gerddoriaeth hefyd gan Debussy a Jean Francaix ochr yn ochr â darnau gan gyfansoddwyr o Gymru fel Christopher Painter, a aned ym Mhort Talbot, a John Metcalf, sefydlydd Gŵyl Bro Morgannwg.

Bydd y daith drwy Gymru yn galw yn Aberystwyth, Caerdydd, Llandudno, Caernarfon, Caergybi a’r Fflint yn ystod mis Mai. Mae manylion llawn am y rhaglen ar ein tudalen digwyddiadau.

Posted on

Cerddoriaeth, Cymraeg a Rumantsch yn y Swistir

Perfformiad ar gyfer Darllediad ar Radio a Theledu Rumantsch.

Roedd y perfformiad ar y cyd â Corcanti Chur a Chôr Rumantsch o flaen disgyblion, athrawon, teuluoedd a’r cyhoedd yn brofiad gofiadwy iawn.  Recordiwyd yr holl ddigwyddiad ar gyfer teledu a radio Romansch.

Yr uchafbwynt oedd perfformio Hen Wlad Fy Nhadau (trefn. Gareth Glyn) ar y cyd gyda chorau ieuenctid o Ysgol Canton Graubünden.  Perfformiodd ein cerddorion groesdoriad o gerddoriaeth o Gymru gan gynnwys cerddoriaeth gan William Mathias, Hilary Tann, Cerdd Dant (trefn Sioned Webb) a’r gân adnabyddus Lisa Lan.

Trafodaeth am Fyw drwy’r Gymraeg a Rumantsch

O dan gadeiryddiaeth cyflwynwraig o Radio a Theledu Rumantscha, Victoria Haas, roedd trafodaeth a ddeilliodd o gwestiynau trylwyr gan y bobl ifanc ynglŷn â chefnogaeth i’r Gymraeg fel un o ddwy iaith swyddogol Cymru, statws y Gymraeg, dwyieithrwydd yng Nghymru a chymhariaeth gyda statws Romansch fel un o bedair iaith swyddogol yn y Swistir.

Wedyn i gloi, perfformiadau ar y cyd (ni a’r corau)  o ganeuon swynol romansch mewn trefniannau arbennig ar gyfer y prosiect gan y cyfansoddwr a’r baswnydd Gion Andreas o gerddoriaeth ei dad, Gion Balzer Casanova.

Cerddoriaeth wrth Galon Addysg

Mae gan Ysgol Canton Graubunden dîm gwych o 7 athro cerddoriaeth gan gynnwys Christian Klucker, llysgennad ein prosiect a Gion Andreas sy’n gweithio mor galed gyda’r bobl ifanc drwy ganu a cherddoriaeth drwy gydol yr ysgol.  Gan siarad gyda Chyfarwyddwr yr ysgol, ces i’r argraff cryf pa mor bwysig yw cerddoriaeth gan helpu’r ysgol a’i staff baratoi ei phobl ifanc am fywyd.

Mae’r cyfleusterau cerddoriaeth ar gyfer oddeutu 2,000 o ddisgyblion yn yr ysgol yn rhagorol.  Rydym yn amau y byddai o leiaf 1 neu 2 o’r conservatoires ac adrannau cerddoriaeth ym Mhrydain yn genfigennus o’r nifer o pianos, ac ystafelloedd sydd ar gael i gerddoriaeth yn unig.

Ymarfer terfynol yn Chur: Anne Denholm a Sara Lian Owen
Ymarfer terfynol yn Chur: Anne Denholm a Sara Lian Owen

Diolchiadau i Gyfarwyddwr, Gion Lechmann a Dirprwy Gyfarwyddwr, Philippe Benguerel o  Bündner Kantonsschule (ysgol uwchradd yn Chur) am eu cefnogaeth.  Diolch i Werner Cariget a’i ddisgyblion am eu gwaith gan baratoi cwestiynnau ar gyfer y drafodaeth ac i Mike Evans am gyfeithu ar y pryd.  Mike yw’r unig person rydym ni’n ei adnabod sy’n siarad Cymraeg a Rumantsch!

Mae rhaid diolch yn arbennig i lysgennad y prosiect, Christian Klucker (Arweinydd Incantanti ac Athro Cerddoriaeth Bündner Kantonsschule) sydd wedi gweithio mor galed i sicrhau llwyddiant ein hymweliad.  Roeddem ni yn arbennig o ddiolchgar iddo fo ac Erica a’u teulu a’i gymdogion, Beatrice ac Andreas, am y croeso, lletygarwch  ac am edrych ar ein holau ni.

Gweithio gyda Cherddorion Ifanc Chur

Gyda chymorth ein cyfieithwyr ar y pryd, Toni, Kurt a Karin, cawsom ni lot o hwyl yn gweithio gydag offerynwyr ifanc ( Gitâr, recorders, ffliwt, sacsoffonau, clarinét, feiolinau, fiolas, sielo) o Musikschule Domat/Ems, Felsberg.

_STO8256
Yn paratoi i ymarfer

Arweiniodd cerddorion Ensemble Cymru ar weithgareddau i gynhesu’r corff, i ddatblygu synnwyr o rhythm ac i ddatblygu’r gallu i anadlu a chynnal sain yn effeithiol.  Wedyn ymlaen â ni i weithio ar drefniant Gareth Glyn o Ar Hyd y Nos ar gyfer yr Ensemble a’r cerddorion ifanc.  Ymunodd arweinydd y gerddorfa, Ursin Widmer ar yr ail ddiwrnod i arwain perfformiad ar ddiweddglo ein deuddydd gyda’r plant a phobl ifanc.

_STO8259

Sibilla Stoltz (canol) ac Anne Denholm (dde)

Roeddem yn hynod o ddiolchgar i Sibilla Stolz (Cyd lynydd y gerddorfa) am ein gyrru ni o gwmpas yn y bws (a’i gwr Rico) ac am drefnu’r 2 weithdy.  Hefyd rydym yn ddiolchgar i Anita Jehli (pennaeth yr ysgol) a’i swyddfa am ein galluogi ni i weithio gyda myfyrwyr yr ysgol ac i Kathrin von Cube (Pennaeth Llinynnau), Bettina Marugg (Pennaeth Ensembl Ffliwt) ac Ursin Widmer (Cyfarwyddwr y gerddorfa) am baratoi’r plant.

Diolchiadau mawr ar ran yr Ensembl: Peryn(Clarinét), Sara (Soprano), Oliver (Fiola), Jonathan (Ffliwt) ac Anne (Telyn) i’r plant a phobl ifanc am fod gymaint o hwyl i weithio gyda nhw!

_STO8314
Jonathan Rimmer (Ffliwt) ac Oliver Wilson (Fiola) yn gweithio gyda’r gerddorfa